Kalaallit Nunaanni Eqqartuussiviit
Kalaallit Nunaanni Eqqartuussiviit Kalaallit Nunaata Eqqartuussisuuneqarfianik, Kalaallit Nunaanni Eqqartuussivimmik aammalu sumiiffinni Eqqartuussivinnik tassani Kujallermi Eqqartuussivimmik, Sermersuumi Eqqartuussivimmik, Qeqqani Eqqartuussivimmik aammalu Qaasuitsumi Eqqartuussivimmik imaqarput. Sumiiffinni arfineq pingasut aalajangersimasumik inuttalersugaapput. Missiliorlugulu 80-inik Eqqartuussiviit sulisoqarput.
Januaarip aallaqqaataa 2010 aallarnerfigalugu Kalaallit Nunaanni eqqartuussisoqarnermi inatsit suliassaqarfinni assigiinngitsuni allanngortinneqarpoq, tassanilu Kalaallit Nunaanni Eqqartuussiviit pilersinneqarput. Taamaattumik 2010-mit kisitsisitigut paasissutissat tunngavigineqartut sumiiffinni eqqartuussiviit, Kalaallit Nunaanni Eqqartuussivik aammalu Kalaallit Nunaata Eqqartuussisuuneqarfia malillugit naatsorsorneqartassapput.
Taamatullu januaarip aallaqqaataa 2010 aallarnerfigalugu eqqartuussivikkoortumik aningaasanik akiliisitsiniarnermut suliat sumiiffiit eqqartuussiviini suliarineqartalerput, tamanna kisitsisitigut paasissutissani suliassaqarfittut nutaajulluni ilaatinneqartalissaaq. Kalaallit Nunaanni Eqqartuussiviit Danmarkimi Eqqartuussivinnut atapput.
Sumiiffinni eqqartuussiviit
Suliat amerlanerpaartaat sumiiffiit eqqartuussiviini aallartinneqartarput. Sumiiffinni eqqartuussiviit eqqartuussisui Kalaallit Nunaata Eqqartuussiviini sumiiffinni eqqartuussisutut ilinniakkamik ilinniarsimasuusarput imaluunniit inatsisilerinermi ilinniarsimasuusarlutik.
Suliaq inatsisitigut naammassiuminaappat sumiiffimmi eqqartuussisup – nalinginnaasumik suliami pineqartup aappaanit inassuteqarfigineqarluni – suliaq Kalaallit Nunaanni Eqqartuussivimmut inatsisilerinermi ilinniarsimasunik eqqartuussisoqartumut ingerlateqqissinnaavaa. Suliaq suli siullermeerlugu suliareqqaarneqassaaq tulliullugulu eqqartuussisuuneqarfimmut ingerlateqqinneqarsinnaalluni.
Eqqartuussutigineqartut aammalu aalajangiinerit sumiiffiit eqqartuussiviini naammassineqarsimasut tamarmik eqqartuussisuuneqarfimmut suliassanngorteqqinneqarsinnaapput. Sumiiffiit eqqartuussiviini aalajangiinerit inuinnarnit suliassanngortinneqarsimasut aammalu pinerluttulerinermi suliassat sumiiffimmi eqqartuussisumit eqqartuussisooqataasuniillu marlunnit aalajangerneqartarput.
Kalaallit Nunaanni Eqqartuussivik
Kalaallit Nunaanni Eqqartuussivik inatsisilerinermi ilinniarsimasunik eqqartuussisoqarluni sulianik siullermeerinernik eqqartuussiviuvoq. Suliassat ilaat Kalaallit Nunaata Eqqartuussiviani sumiiffinnilu eqqartuussivikkooratik aallaqqaataaneerlugit suliarineqartarput. Tassani pineqarput inuinnarnik suliassanngortitat nalinginnaasut, inatsisinik aalajangersimasunik unioqqutitsinerit aammalu akiliisinnaannginnermik suliat – assersuutigalugu akiliisinnaajunnaarnermi aammalu akiitsunik isumakkeerinninnermi.
Kalaallit Nunaanni Eqqartuussiviup eqqartuussinermi akileraarutit aammalu aalajangersimasunik nammineq pigisaqarnermi pigisanullu nuunneqarsinnaasunik piginnaatitaaffinnik, umiarsuit nalunaarsorsimasut minillugit, nalunaarsuinerit suliarisarpai.
Taamatuttaaq sumiiffinni eqqartuussiviit Kalaallit Nunaanni Eqqartuusivimmut sulianik ingerlatitseqqiisinnaapput, suliat naammassiuminaappallaarpata tunngavilersugassaappataluunniit. Eqqartuussivinni suliat saniatigut Kalaallit Nunaata Eqqartuussiviani inatsisilerisut sumiiffiit eqqartuussiviini sulisut ilinniartillugillu ilitsersornissaat akisussaaffigaat.
Kalaallit Nunaanni Eqqartuussiviup ulluinnarni allaffissornikkut aqutsinermi eqqartuussivinni suliassat siullermeerlugit suliarineqarnerat ingerlataraat.
Kalaallit Nunaata Eqqartuussisuuneqarfia
Kalaallit Nunaata Eqqartuussisuuneqarfiani sumiiffiit eqqartuussiviini imaluunniit Kalaallit Nunaata Eqqartuussiviani suliat naammassineqarsimasut, eqqartuussiveqarnermilu inatsit malillugu eqqartuussisuuneqarfimmut aappassaanik suliassanngortinneqarsimallutik ingerlateqqinneqarsinnaasut suliarineqartarput. Tulliullugu suliarineqartarput ataatassarsiuussinermi suliat suliareqqitassanngorteqqitat siullermeerlugit suliat. Eqqartuussisuuneqarfittaaq Den Særlig Klageretimut (immikkut ittumik maalaaruteqartarfik) pinerluttulerinermi sulianut suliareqqitassanngortitsineq pillugu oqaaseqaatinik nalunaaruteqartarpoq.
Sumiiffiit eqqartuussiviini imaluunniit Kalaallit Nunaata Eqqartuussiviani eqqartuussummik aalajangiiffigineqarsimasut tamarmik eqqartuussisuuneqarfimmut suliareqqitassanngortinneqarsinnaapput. Aalajangiinerillu allat tamarmik aamma eqqartuussisuuneqarfimmut ingerlateqqinneqarsinnaallutik. Taakku aalajangiinernik (siornatigut eqqartuussutit inerneri) aammalu peqqussutinik taaneqartarput. Aalajangiinernik eqqartuussisuuneqarfimmut ingerlatitseqqiinerit eqqartuussummik eqqartuussisuuneqarfimmut aalajangeqqitassanngortitsinikkut pisarpoq. Kalaallit Nunaata Eqqartuussisuuneqarfia Nuummi suliaqarfeqarpoq, eqqartuussivinnili suliat pisariaqartillugu aammalu sumiiffiit eqqartuussiviisa suliaqarfiini ingerlanneqartarput.
Suliani eqqartuussutit Kalaallit Nunaata Eqqartuussisuuneqarfiani suliarineqartut kingusinnerpaamik qaammatit pingasut qaangiunnerini suliat aalajangiiffigineqarsimasutut nalunaarutigineqassapput. Eqqartuussisuuneqarfimmi suliaq naammassineqarpat Eqqartuussiviit Qullersaannut taamaallaat suliassanngorteqqinneqarsinnaavoq immikkut illuinnartumik isikkoqarpat. Taama pisoqartillugu Procesbevillingsnævnimit (suliareqqitassanngortitsinermut akuersissutinut immikkoortortaqarfik) tapiissuteqarfigineqarsimanissaq piumasaqaataavoq.
Kalaallit Nunaanni Eqqartuussiviit pillugit nittartakkat qallunaatut: www.domstol.gl imaluunniit kalaallisut: www.eqqartuussivik.gl alakkarneqarsinnaapput.